వెబ్‌సిరీస్‌ : రానా నాయుడు 2 (ఓటీటీ) (RanaNaidu)
ప్రధాన తారాగణం: రానా దగ్గుబాటి, వెంకటేష్‌ దగ్గుబాటి, అర్జున్‌ రామ్‌పాల్, సుర్వీన్‌ చావ్లా, కృతీ కర్భందా, రాహుల్‌ వోహ్రా, సుశాంత్‌ సింగ్, అభిషేక్‌ బెనర్జీ సింగ్
దర్శకత్వం: సుప్రాన్‌ ఎస్‌ శర్మ, అభయ్‌ చోప్రా
నిర్మాణం: లోకో మోటివ్‌ గ్లోబల్‌ మీడియా, సుందర్‌ ఆరోన్, షో టైమ్‌ నెట్వర్క్స్‌
కెమెరా: అంజు సతాని, జాన్‌ స్కిమిడ్త్‌
ఎడిటర్‌: సైనాద్‌
సంగీత దర్శకుడు: జాన్‌ స్టీవర్ట్‌
స్ట్రీమింగ్‌ ఫ్లాట్‌ఫామ్‌ నెట్‌ఫ్లిక్స్‌ (RananaiduOnNetflix)
స్ట్రీమింగ్‌ తేదీ జూలై 13, 2025
రేటింగ్‌ 2.5/5.0
వెంకటేష్‌– రానాలు తొలిసారి కలిసి నటించిన ‘రానా నాయుడు’ వెబ్‌సిరీస్‌ తొలి సీజన్‌ స్ట్రీమింగ్‌ అయినప్పుడు పెద్ద దుమారమే రేగింగ్‌. బూతులు, అశ్లీల సన్నివేశాలు, హింసాత్మక సన్నివేశాల మోతాదు చాలా ఎక్కువగా ఉన్నాయనే టాక్‌ వినిపించింది. నాగ నాయుడు వంటి పాత్రలో వెంకటేష్‌ను, ఆయన అభిమానులు ఊహించలేక పోయారు. ‘రానా నాయుడు’ తొలి సీజన్‌ సిరీస్ స్ట్రీమింగ్‌ తర్వాత సెకండ్‌ సీజన్‌ ఉండదనే అనుకున్నారు. కట్‌ చేస్తే….‘రానా నాయుడు’ సీజన్‌ 2ను అనౌన్స్‌ చేసి, షాక్‌ ఇచ్చారు మేకర్స్‌. మరి…‘రానా నాయుడు’ సీజన్‌ 2 ఎలా ఉంది? తొలి సీజన్‌లానే అశ్లీల, అభ్యంతరకరమైన సన్నివేశాలు ఎక్కువగా ఉన్నాయా? ఎన్ని ఎపిసోడ్స్‌ వంటి విషయాలను రివ్యూలో చదివేయండి.
RanaNaidu2 Story: కథ
పదిహేను సంవత్సరాలు ఓజీ మహాజన్‌ (రాజేష్‌ జైస్‌) దగ్గర పనిచేసిన రానా నాయుడు (హీరో రానా), అతని భార్య నైన (సుర్వీన్‌ చావ్లా) ఒత్తిడి మేరకు, ఇకపై ఫిక్సింగ్‌ పనులు మానుకుని, హ్యాపీగా ఫ్యామిలీ లైఫ్‌ లీడ్‌ చేయాలనుకుంటాడు. కానీ ఇంతలో రానా నాయుడు కొడుకు అని(మాధవ్‌)ని… రౌఫ్‌ మిర్జా (అర్జున్‌ రాంపాల్‌) కజిన్‌ సైఫ్‌ కిడ్నాప్‌ చేస్తాడు. దీంతో రానా నాయుడు తన కొడుకుని విడిపించు కునేందుకు ప్రముఖ వ్యాపారవేత్త , ఒబెరాయ్‌ స్టూడియోస్‌ అధినేత – నిర్మాత విరాజ్‌ ఒబెరాయ్‌ (రజత్‌ కపూర్‌) సాయం తీసుకోవాల్సివస్తుంది. అలాగే తన దగ్గర పనిచేయాలని రానా నాయుడుకి కండీషన్‌ పెడతాడు విరాజ్‌. కొడుకుని కాపాడు కున్న రానా నాయుడు…విరాజ్‌ దగ్గర పనికి ఒప్పకుంటాడు. మరోవైపు విరాజ్‌ ఒబెరాయ్‌ స్టూడియోస్‌ను అమ్మేసి, ముంబై టీసీఎల్‌ క్రికెట్ టీమ్‌ను కొనాలని..తన తండ్రి విరాజ్‌పై ఒత్తిడి చేస్తుంది అతని కుమార్తె ఆలియా (కృతీకర్భందా). మొదట్లో విరాజ్‌ ఒప్పుకోడు. కానీ రానా నాయుడు సాయంతో ఆలియా అనుకున్నది సాధిస్తుంది. కానీ టీఎస్‌ఎల్‌ టీమ్‌ మేనేజ్‌మెంట్‌లో ఐదు శాతం వాటా రానాకు ఉండటం మాత్రం విరాజ్‌కు ఇష్టం ఉండదు. ఈ విషయంలో రానాను విరాజ్‌ ఏ విధంగా ఇబ్బంది పెట్టాడు? తన కజిన్‌ సైఫ్‌ని చంపినందుకు రానా నాయుడు ఫ్యామిలీపై రౌఫ్‌ మిర్జా ఏ విధంగా పగ తీర్చుకున్నాడు? రానా భార్య నైనాను పోలీస్‌ ఆఫీసర్‌ నవీన్‌ ఎందుకు ట్రాప్‌ చేశాడు? రానా నాయుడుకి తన తండ్రి నాగ నాయుడు (వెంకటేష్‌), కూతురు నిత్యా, సోదరులు తేజ్‌ (సుశాంత్‌ సింగ్), జఫ్ఫా(అభిషేక్‌ బెనర్జీ)ల నుంచి ఎలాంటి సమస్యలు ఎదురైయ్యాయి? అన్న ఆసక్తికరమైన విషయాలను నెట్‌ఫ్లిక్స్‌లో స్ట్రీమింగ్‌ అవుతున్న రానా నాయుడు సీజన్‌ 2 సిరీస్ చూసి తెలుసుకోవాలి (Rananaidu season2 Story).
RanaNaidu2 Season2 వివరణ
‘రానా నాయుడు’ తొలి సీజన్‌లో పది ఎపిసోడ్స్‌ ఉంటే…రెండో సీజన్‌లో ఎనిమిది ఎపిసోడ్స్‌ ఉన్నాయి. ఆరోఎపిసోడ్‌ మినహాయించి, మిగతా అన్ని ఎపిసోడ్స్‌ కూడా 45 నిమిషాలకుపైనే ఉన్నాయి. 1,3,8 ఎపిసోడ్స్‌ నిడివి అయితే యాభై నిమిషాలు ఉన్నాయి. తన కొడుకును రానా నాయుడు కాపాడుకునే సన్నివేశాలతో ప్రారంభమైన ఈ సిరీస్, తన కుమార్తెను రౌఫ్‌ మిర్జా నుంచి కాపాడే సన్నివేశాలతో ఈ సిరీస్ ముగుస్తుంది (RanaNaidu2 Review).
తప్పు చేస్తే శిక్ష అనుభవించాల్సిందే. శిక్ష అనుభవించడం కాస్త లేట్‌ కావొచ్చు. కానీ ఈ తప్పు తాలుకూ పర్వవాసానాలు, బాధలను అనుభవించాల్సిందే. దేశంలోనే నెంబర్‌ వన్‌ ఫిక్సర్‌ రానా నాయుడు జీవితంలో కూడా ఇదే జరిగింది. కొత్త జీవితాన్ని ఆరంభించాలనుకున్నప్పుడు తన గత జీవిత సంఘటనలు అతన్ని, వెంటాడి,వేటాడాయి. ఫ్యామిలీ సమస్యలు, ఫ్యామిలీ బిజినెస్, రాజకీయం, క్రికెట్, కుట్ర, అక్రమ సంబం ధాలు, ప్రేమ..వంటి అంశాలను కలబోసి ఈ ‘రానా నాయుడు’ సీజన్‌ 2ను తీసినట్లున్నారు మేకర్స్‌. అయితే తొలిసిరీస్‌లో ఉన్నట్లుగా భూతులు లేవు. కానీ ‘ఫక్‌’ అనే పదం మాత్రం తరచూ వినిపిస్తుంది. రొమాన్స్,
మద్యపాన, హింసాత్మక సన్నివేశాలు బాగానే కనిపించాయి. అందుకే నెట్‌ఫ్లిక్స్‌లో ఈ సిరీస్‌కే ‘ఏ’ రేటింగ్‌ ఉంది.
సిరీస్ (RanaNaidu2 )లో కొత్తదనం ఏమి లేదు. కానీ వివేక్‌ ఒబెరాయ్‌ ఫ్యామిలీ బిజినెస్ గొడవలు, రానా నాయుడు అండ్‌ ఫ్యామిలీ గొడవలతోనే మేజర్‌ సిరీస్ డ్రామా నడుస్తుంది. వివేక్‌ ఒబెరాయ్‌ దగ్గర రానా నాయుడు పనికి కుదిరనప్పట్నుంచి సిరీస్ డ్రామా ఉండే సెకండ్‌ ఎపిసోడ్‌ కాస్త ఆసక్తికరంగా ఉంటుంది. కానీ ఈ సిరీస్ మళ్లీ రోటీన్‌ ట్రాక్ తీసుకోవడం వ్యూయర్స్‌కు బోర్‌ అనిపించవచ్చు. జఫ్పా (అభిషేక్‌ బెనర్జీ) లవ్‌ ట్రాక్, నాగ నాయుడు (వెంకటేష్‌)–తేజ్‌ (సుశాంత్‌ సింగ్)లు కలిసి ఒబెరియ్‌ స్టూడియోస్‌లో చేసే దొంగ తనం, నాగ నాయుడు– అంజలిల ట్రాక్‌లను సిరీస్‌లో బలవంతంగా పెట్టినట్లుంది. బహుషా… వెంకటేష్‌ పాత్రను సెకండ్‌సీజన్‌లో ఎలా ఇంప్లిమెంట్‌ చేయడంతో రైటర్స్‌ విఫలమైయ్యారనిపిస్తుంది. మరీ..ముఖ్యంగా నాగ నాయుడు పాత్ర సూసైడ్‌ బాంబర్‌లా వచ్చే సీన్స్‌ కాస్త ఓవర్‌గా అనిపిస్తాయి. మర్డర్‌ వెపెన్‌ చుట్టూ తిరిగే డ్రామా కూడా పెద్దగా ఆసక్తిగా అనిపించదు.
సిరీస్‌లో కొన్ని ఆసక్తికరమైన సన్నివేశాలూ ఉన్నాయి. హాఫ్‌ న్యూడ్‌ ఫోటోలను చూసిన కొడుకికి రానా నాయుడు మెచ్యూర్డ్‌గా చెప్పే సమాధానాలు సన్నివేశం, అసలు విలన్‌ను రానా నాయుడు కనిపెట్టడం, రానా నాయుడు సోదరుల మధ్య అనుబంధం, భర్తను మళ్లీ నైనా సరైన విధంగా అర్థం చేసుకోవడం వంటి సీన్స్‌ బాగున్నాయి. యాక్షన్‌ సీక్వెన్స్‌ లు బాగున్నాయి. చివరి రెండు ఎపిసోడ్స్‌లో మేజర్‌ పార్ట్‌ యాక్షన్‌దే.
RanaNaidu2 Cast and Crew:నటీనటుల పెర్ఫార్మెన్స్‌
ఈ సిరీస్ మొత్తాన్ని తన భుజస్కంధాలపై నడిపించాడు రానా (Rana in RanaNaidu)). తండ్రిగా, ఫిక్సర్‌గా, భర్తగా, వ్యాపార వేత్తగా, సోదరుడిగా…డిఫరెంట్‌ లేయర్స్‌ ఉన్న పాత్రలో రానా మంచి నటన కనబరిచాడు. యాక్షన్‌ సీన్స్‌ లోనూ మెప్పించాడు. నాగనాయుడు పాత్రలో వెంకటేష్‌ (Venkatesh role in Rananaidu)కు ఈ సిరీస్‌లో పెద్ద స్క్రీన్‌ ప్రజెన్స్‌ ఏమీ లేదు. కానీ ఒకట్రెండు యాక్షన్‌ సీన్స్‌ అయితే చేశాడు. వెంకటేష్‌ పాత్రకు రచయితలు పెద్ద ఇంపార్టెన్స్‌ ఇవ్వను న్నట్లు న్నారు. రౌఫ్‌ మిర్జాగా అర్జున్‌ రాంపాల్‌ పాత్రలో కొత్తదనం లేదు. రోటీన్‌ రౌడీషీటర్‌ కమ్‌ ముంబై గ్యాంగ్‌ స్టర్‌గా చేశాడు. విరాజ్‌ ఒబెరాయ్‌గా రజత్‌కు మంచి ఇంపార్టెన్స్‌ రోల్‌ దక్కింది. ఆయన మంచి నటన కనబరచారు. ఇక ఆలియాగా కృతీకర్భందకు కథలో ప్రాముఖ్యత ఉన్న పాత్ర దొరికింది. ఓ రకంగా కథను ముందుకు తీసుకుని వెళ్లేది ఈ పాత్రే. కాస్త నెగటివ్‌ షేడ్స్‌ కూడా ఉన్నాయి. నైనాగా సుర్వీన్‌ చావ్లాది బల మైన పాత్రే. కానీ ఈ పాత్రను ఎక్కువగా రొమాన్స్ దిశగా తీసుకువెళ్లారు రచయితలు. పోలీసాఫీసర్‌ నవీన్‌ గా డినో మోరియా, రానా నాయుడు సోదరులు తేజ్‌గా సుశాంత్‌ సింగ్, జప్ఫాగా అభిషేక్‌ బెనర్జీలు వారి వారి పాత్రల మేరకు చేశారు. ఆదిత్య మీనన్, రాజేష్‌ జైష్, నిత్యగా అఫ్రాహ్‌ సయ్యిద్‌లు వారి పాత్రల పరిధి మేరకు యాక్ట్‌ చేశారు.
సుప్రాన్‌ ఎస్‌ శర్మ, అభయ్‌ చోప్రాలు దర్శకులుగా ఇంకాస్త మెరుగైన ప్రయత్నం చేసి ఉండాల్సింది. ఈ తరహా రోటీన్‌ కథతో ఆడియన్స్‌ ఈ రోజుల్లో మెప్పించడం కష్టం. నిర్మాణ విలువలు బాగున్నాయి. సైనాద్‌ తన కత్తెరకు ఇంకాస్త పనిచేప్పవచ్చు. జాన్‌ స్టీవర్ట్‌ మ్యూజిక్, ఆర్‌ఆర్‌ ఈ సిరీస్‌కు పెద్ద ఫ్లస్‌ కాలేదు.
