‘పెద్ది’ ఐటం సాంగ్.. రామ్ చరణ్ తో మాస్ స్టెప్పులేయనున్న క్లాస్ హీరోయిన్!

టాలీవుడ్‌లో స్టార్ హీరోయిన్లు స్పెషల్ సాంగ్స్‌లో మెరవడం అనేది ఇప్పుడు ఒక క్రేజీ ట్రెండ్‌గా మారింది. తక్కువ రోజులు కేటాయించి, భారీ పారితోషికంతో పాటు యువతలో మంచి పాపులారిటీ సంపాదించుకునే అవకాశం ఉండటంతో అగ్ర నాయికలు కూడా ‘ఐటెం’ సాంగ్స్‌కు గ్రీన్ సిగ్నల్ ఇస్తున్నారు. తాజాగా ఈ జాబితాలోకి ‘సీతారామం’ బ్యూటీ మృణాల్ ఠాకూర్ వచ్చి చేరింది. మెగా పవర్‌స్టార్ రామ్ చరణ్ హీరోగా బుచ్చిబాబు సానా దర్శకత్వంలో రూపొందుతున్న ‘పెద్ది’ చిత్రానికి సంబంధించి ఒక ఆసక్తికరమైన వార్త ఫిలిం నగర్‌లో హల్చల్ చేస్తోంది.

రామ్ చరణ్ కెరీర్‌లో ఎంతో ప్రతిష్టాత్మకంగా తెరకెక్కుతున్న ఈ పాన్ ఇండియా మూవీలో ఒక స్పెషల్ సాంగ్ కోసం చిత్ర యూనిట్ మృణాల్ ఠాకూర్‌ను సంప్రదించినట్లు తెలుస్తోంది. చరణ్ పక్కన మాస్ సాంగ్‌లో మెరిసే అవకాశం రావడం, పైగా ఇది భారీ ప్రాజెక్ట్ కావడంతో మృణాల్ వెంటనే అంగీకరించినట్లు సమాచారం. ఈ చిత్రం కోసం ఆస్కార్ విజేత ఏ.ఆర్. రెహమాన్ ఇప్పటికే ఒక అద్భుతమైన మాస్ ట్యూన్‌ను సిద్ధం చేశారట. ఈ పాటను అత్యంత ఖరీదైన సెట్‌లో, విజువల్ గ్రాండ్‌నెస్ ఉండేలా చిత్రీకరించేందుకు ప్లాన్ చేస్తున్నారు. గ్రామీణ క్రీడల నేపథ్యంలో సాగే ఈ పీరియాడిక్ డ్రామాలో రామ్ చరణ్ గతంలో ఎన్నడూ లేని విధంగా రగ్గడ్ లుక్ లో కనిపించబోతున్నారు.

పొడవైన జుట్టు, గుబురు గడ్డం, కండలు తిరిగిన శరీరంతో చరణ్ ఈ సినిమాలో ఊరమాస్ అవతారంలో మెరవనున్నారు. ఈ చిత్రాన్ని మార్చి 27, 2026న ప్రపంచవ్యాప్తంగా థియేటర్లలో విడుదల చేయాలని మేకర్స్ లక్ష్యంగా పెట్టుకున్నారు. క్లాస్ పాత్రలకు కేరాఫ్ అడ్రస్‌గా నిలిచిన మృణాల్, మొదటిసారి చరణ్‌తో కలిసి మాస్ పాటలో స్టెప్పులేస్తే థియేటర్లు దద్దరిల్లడం ఖాయమని మెగా అభిమానులు ఖుషీ అవుతున్నారు.