Nithin : టాలీవుడ్ యువ కథానాయకుడు నితిన్ కెరీర్ ప్రస్తుతం అత్యంత గడ్డు కాలాన్ని ఎదుర్కొంటోంది. బాక్సాఫీస్ వద్ద వరుస పరాజయాలు ఆయనను వెంటాడుతున్నాయి. కోవిడ్ కి ముందు వచ్చిన ‘భీష్మ’ తర్వాత నితిన్కు సరైన కమర్షియల్ సక్సెస్ దక్కలేదు. ‘రంగ్ దే’ ఓ మోస్తరుగా అనిపించినా, ఆ తర్వాత వచ్చిన ‘చెక్’, ‘మాచర్ల నియోజకవర్గం’, ‘ఎక్స్ట్రా’, ‘రాబిన్ హుడ్’ మరియు ‘తమ్ముడు’ వంటి చిత్రాలన్నీ భారీ డిజాస్టర్లుగా మిగిలాయి. నితిన్ మార్కెట్ పరిధిని మించి బడ్జెట్ పెట్టినప్పటికీ, అవేవీ ఆయనకు కలిసి రాలేదు. ఈ వరుస ఫ్లాపుల ప్రభావం ఇప్పుడు ఆయన చేతిలో ఉన్న ప్రాజెక్టులపై పడుతోంది. నితిన్ చేయాల్సిన మూడు క్రేజీ సినిమాలు ఇప్పుడు ఇతర హీరోల చేతుల్లోకి వెళ్లడం ఇండస్ట్రీలో చర్చనీయాంశంగా మారింది.
‘బలగం’ వేణు దర్శకత్వంలో రూపొందాల్సిన ‘ఎల్లమ్మ’ చిత్రంలో మొదట నితిన్ హీరోగా అనుకున్నారు. కానీ నిర్మాత దిల్ రాజు అనూహ్యంగా నితిన్ స్థానంలో సంగీత దర్శకుడు దేవి శ్రీ ప్రసాద్ను హీరోగా ఎంపిక చేసి అందరినీ ఆశ్చర్యపరిచారు. మైత్రీ మూవీ మేకర్స్ నిర్మాణంలో శ్రీను వైట్ల దర్శకత్వంలో నితిన్ ఒక సినిమా చేయాల్సి ఉంది. అయితే నితిన్ ఈ ప్రాజెక్ట్ నుండి తప్పుకోవడంతో, ఆ ప్లేస్లోకి శర్వానంద్ వచ్చారు. (శ్రీను వైట్ల ఫామ్లో లేకపోవడం వల్లే నితిన్ తప్పుకున్నారనే టాక్ ఉన్నా, ప్రస్తుత పరిస్థితుల్లో ఇది కూడా ఒక లోటుగానే కనిపిస్తోంది. తాజాగా నితిన్కు మరో షాక్ తగిలింది. విక్రమ్ కె. కుమార్ దర్శకత్వంలో గుర్రపు స్వారీ నేపథ్యంలో సాగే ఒక స్పోర్ట్స్ డ్రామాలో నితిన్ నటించాల్సి ఉంది.
కానీ తాజా సమాచారం ప్రకారం ఈ ప్రాజెక్ట్ నుండి కూడా నితిన్ తప్పుకోగా, ఆయన స్థానాన్ని విజయ్ దేవరకొండ భర్తీ చేసినట్లు తెలుస్తోంది. సినీ పరిశ్రమలో విజయాలే ఒక హీరో భవిష్యత్తును నిర్ణయిస్తాయి. ఒక్క హిట్ కూడా పడకపోవడంతో నిర్మాతలు మరియు దర్శకులు నితిన్తో రిస్క్ చేయడానికి వెనకాడుతున్నట్లు కనిపిస్తోంది. వరుసగా ముగ్గురు దర్శకుల సినిమాలు (వేణు, శ్రీను వైట్ల, విక్రమ్ కుమార్) చేతులు మారడం నితిన్ కెరీర్లో ఒక ఆందోళనకరమైన పరిణామమే. ఒకప్పుడు వరుస హిట్స్ అందుకున్న నితిన్, ఈ సంక్షోభం నుండి బయటపడాలంటే అర్జెంట్గా ఒక సాలిడ్ బ్లాక్ బస్టర్ కొట్టాల్సిందే. లేదంటే మరిన్ని ప్రాజెక్టులు చేజారే ప్రమాదం ఉంది.
